نذر سودا
فکر دلداری گلزار کروں یا نہ کروں |
ذکرِ مرغان گرفتار کروں یا نہ کروں |
قصہ سازش اغیار کہوں یا نہ کہوں |
شکوہ یارِ طرحدار کروں یا نہ کروں |
جانے کیا وضع ہے اب رسمِ وفا کی اے دل |
وضعِ دیرینہ پہ اصرار کروں یا نہ کروں |
جانے کس رنگ میں تفسیر کریں اہلِ ہوس |
مدحِ زلف و لب و رخسار کروں یا نہ کروں |
یوں بہار آئی ہے امسال کہ گلشن میں صبا |
پوچھتی ہے گزر اس بار کروں یا نہ کروں |
گویا اس سوچ میں ہے دل میں لہو بھر کے گلاب |
دامن و جیب کو گلنار کروں یا نہ کروں |
ہے فقط مرغِ غزلخواں کہ جسے فکر نہیں |
معتدل گرمی گفتار کروں یا نہ کروں |
شاعر کا نام : فیض احمد فیض
پیشکش : شعبۂ تحریر و پیشکش تبیان
متعلقہ تحریریں:
میں مرمٹا تو وہ سمجھا یہ انتہا تھی مری
ترے ملنے کو بے کل ہو گۓ ہیں
او میرے مصروف خدا
اکبر( akbar)
ایک رہگزر پر
روشنی